آل پاکستان میمن فیڈریشن کی جنرل کونسل کا اہم اجلاس جمعہ، 15 مئی 2026 کو میمن فیڈریشن ہاؤس میں کامیابی کے ساتھ منعقد ہوا، جس میں کراچی، حیدرآباد اور سکھر سے تعلق رکھنے والے اراکین نے بھرپور شرکت کی۔ اجلاس کا آغاز تلاوتِ کلامِ پاک اور نعتِ رسولِ مقبول ﷺ سے ہوا، جس نے محفل کو روحانی اور باوقار ماحول فراہم کیا۔ آل پاکستان میمن فیڈریشن کے صدر جناب شبیر ہارون نے اراکین کی فعال شرکت اور باہمی اتحاد کو سراہتے ہوئے اس عزم کا اظہار کیا کہ فیڈریشن “اتحاد، خدمت اور ترقی” کے اصولوں کے تحت میمن برادری کی فلاح و بہبود کے لیے اپنی خدمات جاری رکھے گی۔
اجلاس میں سالانہ رپورٹ برائے 2025-26 متفقہ طور پر منظور کی گئی جبکہ سیکریٹری جنرل کی رپورٹ کو اس کی جامعیت، کارکردگی اور مستقبل کے مؤثر لائحۂ عمل پر بھرپور خراجِ تحسین پیش کیا گیا۔ تنظیمی نظام کو مزید مضبوط بنانے کے لیے آئینی ترمیم بھی پیش کی گئی جسے جنرل کونسل نے منظور کر لیا۔ اراکین نے صدر، سیکریٹری جنرل اور تمام عہدیداران کی خدمات اور کارکردگی کو قابلِ تحسین قرار دیا۔ اجلاس کے دوران کھلے اجلاس میں شرکاء نے مختلف مثبت تجاویز پیش کیں جنہیں خوش دلی سے قبول کیا گیا، جبکہ اس موقع پر میمن برادری کے اتحاد، باہمی تعاون اور اجتماعی ترقی کے عزم کا بھرپور اظہار بھی دیکھنے میں آیا۔
